2 Gorffennaf 2009 - Cau Gorsaf Profi Cerbydau Llandrindod
Bydd Gorsaf Brofi’r Asiantaeth Gwasanaethau Cerbydau a Gweithredwyr (VOSA) yn Llandrindod yn cau ar 25 Medi 2009.
Mae cau’r orsaf hon yn rhan o gynllun hirdymor VOSA i wella effeithlonrwydd yn ei rwydwaith gorsafoedd profi. Bydd yn gwneud hyn drwy ddatblygu cyfleusterau awdurdodedig newydd, a fydd dan gontract gan yr Asiantaeth, yn lle’r gorsafoedd profi hŷn y mae nifer ohonynt yn dyddio’n ôl i’r cyfnod cyn datblygu traffyrdd yn y Deyrnas Unedig.
Bydd staff gorsaf brofi Llandrindod yn symud i safleoedd cyfagos i gynnal profion a bydd VOSA yn sicrhau bod cwsmeriaid a fydd yn gweld effaith cau'r orsaf yn cael yr wybodaeth ddiweddaraf. Bydd hefyd yn cynorthwyo cwsmeriaid i drefnu profion mewn lleoliadau eraill yn y dyfodol. Cynhelir seminar i gwsmeriaid ar 15 Gorffennaf yng Ngwesty'r Metropole yn Llandrindod i drafod cau'r orsaf a chynlluniau ar gyfer profi yn yr ardal yn y dyfodol.
Mae VOSA eisoes wedi cyhoeddi y bydd 3 gorsaf brofi a 10 llwybr profi arall yn cau ledled y wlad.
Yn ôl Alex Fiddes, Prif Swyddog Gweithredu VOSA, “Mae cynlluniau VOSA i sicrhau gwasanaeth mwy modern yn cynnwys diweddaru’r rhwydwaith Safleoedd Dynodedig drwy greu Cyfleusterau Profi Awdurdodedig a fydd yn cael eu rhedeg gan gwmnïau preifat megis gweithredwyr a chwmnïau sy’n darparu gwasanaethau cynnal a chadw. Bydd staff VOSA yn parhau i ddarparu profion annibynnol a rheoledig ar gyfer y Cyfleusterau Profi Awdurdodedig.
“Rydym am ddarparu gwasanaeth mwy modern a mwy effeithlon i’n cwsmeriaid. Mae VOSA wedi bod yn gweithio gyda gweithredwyr a chwmnïau sy’n darparu gwasanaethau cynnal a chadw ers tro er mwyn gallu mynd ati’n llwyddiannus i gynnig gwasanaeth profi mewn safleoedd dynodedig. Mae mynd â’n gwasanaethau i’r cwsmer yn golygu bod y cerbyd yn segur am gyfnod byrrach ac, o ganlyniad, mae’n fwy economaidd i weithredwyr. Mae cau’r orsaf hon yn rhan o raglen sy’n edrych ar weddnewid trefn brofi VOSA. Bydd VOSA yn parhau i drafod cynigion ar gyfer newid gyda'r diwydiant a chyda'i gwsmeriaid.
Ychwanegodd Alex Fiddes:
“Mae gan VOSA weledigaeth gref o weddnewid y gwasanaeth profi - mae am weld profion yn cael eu cynnal gan staff profiadol yn nes at y safleoedd cynnal a chadw a gweithredu. Mae’n weledigaeth sy’n cefnogi ein nod, sef achub bywydau ar ffyrdd Prydain.”
Diwedd
Photo-caption: Llandrindod Wells test station
Nodiadau i olygyddion
Ym mis Ebrill 2009, hanerodd VOSA y costau ychwanegol a godir ar hyn o bryd am gynnal profion y tu allan i safleoedd yr Asiantaeth ac mae’n bwriadu dileu’r costau ychwanegol yn llwyr yn 2010, yn amodol ar ymgynghoriad. Bydd hyn yn lleihau’r costau i weithredwyr sydd am ddefnyddio safleoedd a reolir gan drydydd parti, sydd wedi’u lleoli’n fwy hwylus ar gyfer eu gwaith.
Bydd y manteision a geir yn dilyn yr agenda moderneiddio cyffredinol yn cynnwys
gwasanaeth sy’n addas ar gyfer yr unfed ganrif ar hugain
mwy o ddewis a gwerth i gwsmeriaid
cynnal profion yn nes at y man lle mae gwaith yn cael ei gynnal ar y cerbyd
mwy o hyblygrwydd gyda’r potensial i ymestyn oriau agor, bydd hyn yn arwain at gerbydau’n segur am gyfnod byrrach oherwydd y bydd modd, er enghraifft, cynnal profion yn yr oriau mân er mwyn i’r cerbydau fod yn ôl ar y ffordd y bore hwnnw
cyfleoedd busnes newydd i weithredwyr ac i ddarparwyr gwasanaethau cynnal a chadw cerbydau
Mae’r Asiantaeth Gwasanaethau Cerbydau a Gweithredwyr (VOSA) yn gyfrifol am y canlynol:
• Prosesu ceisiadau am drwyddedau i redeg gwasanaethau lorïau a bysiau a chofrestru gwasanaethau bws
• Gweithredu a gweinyddu cynlluniau profi i bob cerbyd, gan gynnwys goruchwylio'r cynllun profi MOT
• Gorfodi'r gyfraith ar gerbydau i sicrhau eu bod yn cydymffurfio â safonau a rheoliadau cyfreithiol
• Gorfodi oriau gyrwyr a gofynion trwyddedu
• Cefnogi Comisiynwyr Traffig i'w helpu i wneud penderfyniadau doeth am drwyddedu gweithredwyr, gyrwyr galwedigaethol a gofynion cofrestru bysiau
• Darparu hyfforddiant a chyngor ar gyfer gweithredwyr masnachol
• Ymchwilio damweiniau cerbyd, diffygion a phrosesau galw’n ôl.
Page last updated: 03/07/2009