Achosion rhesymol dros ryddhau data

Yn gyffredinol, mae achosion rhesymol dros ryddhau data o gofrestr cerbydau DVLA yn ymwneud ag achosion moduro y mae’r gyrrwr neu’r ceidwad yn atebol amdanynt. Gall y rhain gynnwys materion yn ymwneud â diogelwch ar y ffordd, digwyddiadau sy’n deillio o ddefnyddio cerbydau, gorfodi deddfwriaeth traffig ffordd a chasglu trethi.

Byddwn yn ymddwyn yn gyfrifol ac yn unol â’r ddeddfwriaeth ym mhob mater sy’n ymwneud â rhyddhau data.

Y ceisiadau ymarferol
Rydym yn cael ceisiadau am wybodaeth gan sefydliadau preifat, a’r rheini’n cynnwys cwmnïau gorfodi rheolau parcio, twrneiod, ariandai a rheolwyr eiddo. Bydd pob cais yn cael ei ystyried yn unigol er mwyn sicrhau bod preifatrwydd modurwyr yn cael ei ddiogelu'n briodol.

Pan fyddwn ni’n rhyddhau data, byddwn bob amser yn gwneud hynny at ddiben penodol sy’n dwyn budd. Mae’r enghreifftiau canlynol yn rhoi arweiniad, ond nid yw’n rhestr derfynol.

Parcio
Drwy ryddhau data cerbydau, rydym yn galluogi perchnogion tir neu eu hasiantau i ddiogelu eu heiddo drwy ddod o hyd i geidwad cerbyd sydd:

• Yn atal mynediad neu wedi cael ei adael ar eiddo preifat heb yn wybod i berchennog y tir a heb ei ganiatâd;
•  Wedi cael ei barcio heb dalu'r ffioedd perthnasol, neu wedi cael ei barcio’n anystyriol, mewn cyfleusterau parcio, er enghraifft mewn man wedi'i gadw ar gyfer modurwyr anabl.

Twyll
Gellir rhyddhau data cerbydau DVLA er mwyn:

• Dod o hyd i geidwad cerbyd sydd wedi gyrru ymaith heb dalu’r ffioedd ar gyfer defnyddio ffordd, twnnel neu bont;
• Dod o hyd i geidwad cerbyd sydd wedi gyrru ymaith heb dalu, neu sydd wedi talu am betrol neu am drwsio'r cerbyd mewn modd twyllodrus;
• Helpu cymhwyswyr colledion sy’n gweithredu ar ran cwmni yswiriant i gadarnhau a yw damwain traffig ffordd wedi cael ei llwyfannu neu a yw hawliad ynghylch lladrad yn dwyllodrus;
• Gallu dod o hyd i gyn berchnogion fel rhan o ymchwiliad i droseddau sy’n ymwneud â newid milltiroedd ar y cloc dan y Ddeddf Disgrifiadau Masnach.

Cyllid
Ceir sawl enghraifft lle gallai rhyddhau data cerbydau DVLA arwain at oblygiadau ariannol pwysig. Gellir defnyddio’r system:

• I leihau troseddu drwy alluogi cwmnïau cyllid i ddod o hyd i geidwaid cerbydau sydd wedi cael cytundeb benthyciad neu brydles ar gerbyd drwy dwyll; 
• Helpu derbynnydd neu ddiddymwr a benodwyd gan y llys i bennu asedau cerbyd mewn achosion ansolfedd; 
• Cadarnhau manylion ceidwad cerbyd er mwyn galluogi asiantau casglu dyledion sy’n gweithredu dan orchymyn llys i atafaelu cerbyd.

Damweiniau/Digwyddiadau
Weithiau, defnyddir data a ryddheir o gofrestr cerbydau DVLA i ddatrys achosion yn ymwneud â cherbydau. Er enghraifft, gall wneud y canlynol: 

• Helpu cwmni yswiriant sy’n gweithredu ar ran deiliad polisi i ddod o hyd i bartïon eraill sy’n gysylltiedig â digwyddiad neu ddamwain traffig ffordd; 
• Helpu i ddod o hyd i geidwad cerbyd a oedd yn gysylltiedig â mân ddigwyddiad damwain a dianc, lle nad oes ymchwiliad llawn gan yr heddlu. Gallai hyn gynnwys anaf personol neu ddifrod i gerbyd neu i eiddo; 
• Galluogi twrnai sy’n gweithredu ar ran cleient i ddod o hyd i geidwad cerbyd a oedd mewn digwyddiad, neu lle mae'r cerbyd yn rhan o achos cyfreithiol.

Defnydd arall
Ceir llawer o sefyllfaoedd amrywiol lle gellir dangos achos rhesymol dros ryddhau data o gofrestr cerbydau DVLA. Mae’r rhain yn cynnwys:

• Cyflenwi manylion cyswllt os bydd gwneuthurwr neu ddosbarthwr yn galw cerbydau'n ôl am resymau diogelwch; 
• Galluogi unigolyn sy’n gweithredu fel ysgutor ystad i gadarnhau cerbydau sy’n cael eu cyfrif yn asedau; 
• Helpu ceidwad cofrestredig presennol cerbyd i olrhain hanes y cerbyd yn llawn. Gellid gwneud hyn oherwydd rhesymau personol, at bwrpas yswiriant, i'w roi i geidwad newydd wrth werthu neu drosglwyddo, neu i ddatrys dadl yn y diwydiant moduro.

Llwytho ‘Rhestr o'r math o gyrff sy'n gwneud cais am wybodaeth o gofrestr cerbydau DVLA’ (PDF, 10K)

Llwytho 'Rhestr o gwmnïau sy'n gwneud cais am wybodaeth ac yn derbyn gwybodaeth drwy gyswllt electronig (PDF, 10K)